Bida Nagari Tanjung Sani

Saliguri Bapaga Nibung, 

Nibung Bapaga Jo Lilitan 

Dibaliak Batang Limpato

Kampuang Kami Bapaga Gunung, 

Gunuang Balantai Jo Lawitan, 

9 Kenagarian Di Dalam Nyo

Partamo Kenagarian Maninjau, 

Taruih ka Bayua Duo Koto, 

Paninjauan jo Koto Kaciak, 

sarato Koto Gadang Jo Koto Malintang

Sungai Batang nan Kasalapan 

sarato Tanjung Sani nan Ka sambilan

Satantang Kenagarian Tanjung Sani

Tanjung Sani malereng Tabiang, rumah babarih ateh bawah

Rancak ranah nyo kampung Pandan, 

Panjang babelok di Galapung, Batu Nanggai tapian Mandi

Muko Jalan sandaran Bukik, 

Pangka Tanjung Aia nyo Dalam

Kilek Pangayuah Rang Sigiran, 

Rangkuah dayuang rang Sungai Tampang 

Dondong Anak Rang Lubuak Sao

Lenggang ka pasa Urang Arikia, 

Dama Gadang Mandado dulang, 

Koto Panjang Baladang Padi, 

Kabun kopi di Sibarasok.

Dari Anak aia Aji taruih ka Wateh, 

mandaki ka puncak Telkom, 

Lubuak Nyanyuak Balantak Basi

Manurun ka batu balipek, 

Manjorok ka rimbo Pabatungan basabalahan jo Palembayan, 

Ngungun babateh jo Lubuk Basung, 

Mandaki lalu ka ikua rikia, 

Polongan mudiak ka hulu, 

Bukik Batualang Tinggi Mambujua

Lalu Malingka Malereng Bukik. 

Basabalahan Jo Padang Pariaman jo Malalak Bateh di Timur

Disinan lah Tanah Nan sabingkah, 

aia nan satitiak sarato rumpuik nan sahalai 

nan manjadi hak nan ba punyo 

ganggam nan baumpuk 

Ulayat di Niniak Mamak.

Salapan suku di dalam nyo 

Pangulu nan 50 tambah 1 

itulah Kenagarian Tanjung Sani.